يا بوسطجي //شعر وحيد علي محمد حسين

يا بوسطجي 
يا بوسطجي 
فيه جواب ليه
أنا قاعدة مستنيه
فاتت سنين
خدني الحنين
والشوق قتلني
ويا الضنا
وهاموت انا
يا بوسطجي
مافيش ورقة صغيرة
من حبيب غاب عني
من كام سنة
ترك بلادة وراح شبابه
والحزن فات هولي أنا
يا بوسطجي قول لي الحقيقة
ما بعتش ولا حتى سطر
والله ما هتاخد منه دقيقة
يشفي بيها قلب حبه
وعين بكت على فراقه
وانا بودعه وادعي له
إن ربنا يستره في كل دربه
يا بوسطجي خلاص تعبت
والله زهقت م الانتظار
طول الليل ويا النهار
هو اللي بيرحل بينسى اللي ليه
يا ست ارتاحي وريحي البال
أكيد هايبعت لك يقول لك
ويريحك من غير سؤال
الغربة كربة للي هاجر
لا حد عارف ولا حد عاذر
الكل شايف من بعيد
فاكر اللي برة عايش سعيد
ولا عمره فكر إن إللي بره
فات على عمره القصير
كام مناسبة وكام عيد
اصبري بكره هايبعت لك أكيد
وابقي قولي للي يسأل
أعذروا كل اللي سافر
يمكن ظروفوا ملخبطة
أو النفسية محبطة
لو كل واحد راح مكانه
هايقدره ويعذره
ويعرف إنه عايش
وحيد زمانه
هي كده الغربة
شقى وحنين وأنين دفين
وكام ورقة مكتوبة على سطرين
يمكن بدم أو بدموع العين
يا بوسطجي لو جالك جواب
أبقى خبط ع الباب
ولو ما افتكر إن له أحباب
أنا مسمحاه من غير عتاب
أكيد هايرجع وانا في انتظاره
يجي ينور ويزور الأعتاب
من غير لوم ولا عتاب
وهي إيه الدنيا يا بوسطجي
غير أهل واصحاب وأحبابي
شعر/وحيدعلي محمدحسين